wakulima washauriwa kutumia jokofu la asili

Imetumwa: August 6th, 2023

Na . Yuster Sengo

Wakulima wameshauriwa kutengeneza na kuandaa jokofu la asili kwaajili ya kutunzia mazao yao ili yasiharibike wakati wakiwa wanatafuta soko la kuuza mazao hayo

Ushauri huo umetolewa na Afisa wa jeshi  la kujenga Taifa (JKT) bw.Rafii Rajab  wakati akizungumza na redio Ulanga fm kwenye banda la JKT wakati wa maonesho ya nanenane kanda ya mashariki yanayofanyika mjini Morogoro  2023

Aidha ameongeza kuwa utaalam uliotumika kwenye kutengeneza jokofu hilo la asili ni wakawaida ambapo mtu yoyote anaweza kulitengeneza kwa matumizi ya nyumbani

“hapa unatumia miundombinu mbalimbali kama makuti,mkaa,mbao na waya lengo kubwa ni kuhifadhia mboga mboga ili zisiharibike lakini pia vinywaji ili viweze kupata baridi “Amesema Bw.Rajab

Hata hivyo ameongeza kuwa ili kuweza kupata ubaridi mzuri kutoka kwenye jokofu hilo inakulazimu kumwagilia maji ya kutosha kwenye mkaa kwa siku mara tatu hadi nne

“tukimwagia mkaa wetu maji kwa siku mara tatu kinachotokea ndani ya jokofu letu ni ubaridi na vile vitu vinavyopatikana humo ndani vinapata ubaridi unaosaidia kufanya vitu hivyo kukaa kwa muda mrefu bila kuharibika”Ameongeza Bw.Rajab

Maonesho ya nane nane yanafanyika mjini Morogoro kwa kanda ya mashariki inayobebwa na kauli mbiu isemayo “Vijana na Wanawake ni msingi imara wa mifumo endelevu ya chakula”