Ulanga kuadhimisha siku ya Mashujaa kwenye kaburi lililozikwa Mashujaa zaidi ya 3000

Imetumwa: July 25th, 2022

Na Yuster Sengo

Halmashauri ya Wilaya ya Ulanga kwa mara ya kwanza imeadhimisha siku ya Mashujaa kwa kufanya Ibada/Dua na kuweka mashada ya maua kwenye kaburi lililozikwa Mashujaa zaidi ya 3000  waliopigana vita ya majimaji mwaka 1905-1907

Akizungumza wakati wa maadhimisho hayo Mkuu wa Wilaya ya Ulanga Mh. Ngollo Malenya amesema kuwa Serikali ya jamuhuri ya Muungano wa Tanzania  inatambua umuhimu wa Mashujaa waliokufa kwenye vita na ndiyo maana imewekwa tarehe rasmi kwaajili ya kuenzi maadhimisho ya Mashujaa

“Tumekusanyika hapa kwakuwa tunatambua mchango wa Mashujaa waliopigana vita kwaajili ya kupigania Uhuru na Serikali pia inatambua mchango wa Mashujaa wetu ndiyo maana kukawa na Tarehe rasmi ya maadhimisho hayo”Amesema Mh. Ngollo

Hata hivyo akizungumza katika maadhimisho hayo Afisa Tawala  bi. Huruka Rajab amemshukuru Mkuu wa Wilaya ya Ulanga na Ofisi ya Mkurugenzi kwa kufanya juhudi ya kukarabati eneo hilo la kaburi la Mashujaa na kulifanya liwe na hadhi inayotakiwa kwa kuweka mnara

“Hili eneo lilikuwepo lakini Mkuu wa Wilaya na Mkurugenzi wamefanya juhudi ya kujenga Mnara huo kwaajili ya kumbukumbu ya Mashujaa waliopigana vita 1905-1907”Amesema Bi.Huruka

Naye Afisa Maliasili Bi. Florencia Massawe akisoma Taarifa ya Maadhimisho ya siku ya Mashujaa amesema kuwa siku hii huadhimishwa tarehe 25/7 kila mwaka na sababu ya maadhimisho haya ni kuenzi Mashujaa waliopigana vita mwaka 1905-1907 baada ya waafrika kulazimishwa kulima Pamba bila ujira

Maadhimisho hayo ambayo yamefanyika katika eneo la kaburi la Mashujaa lililopo katika kijiji cha Chamange imeleta historia mpya kwani Maadhimisho hayo yamefanyika kwa mara ya kwanza wilayani Ulanga kwa kuzuru Eneo hilo na Kufanya Dua/Sala  fupi kwaajili ya kuwaombea Mashujaa waliozikwa mahali hapo