Chama cha wafugaji Ulanga

Imetumwa: July 12th, 2017

Chama cha wafugaji wilayani Ulanga mkoani Morogoro kimesema uhaba wa maeneo ya malisho ni miongoni mwa changamoto zinazowakabili wafugaji wilayani hapa ambazo ndizo huchangia migogoro mingi ya muda mrefu kati ya  wakulima  na wafugaji.

Chama hicho kiliyasema hayo ikiwa ni siku chache  kabla viongozi wa chama hicho kutoka kila wilaya nchini kukutana na Makamu wa Rais wa Jamuhuri ya Muungano wa Tanzania  mama Samia Hassan Suluhu kujadili changamoto mbalimbali zinawakabili wafugaji nchini.

Akizungumza  Mwenyekiti wa wafugaji wilaya ya Ulanga Bwana Peter Ndaturu alisema amefurahishwa  na uamuzi wa Makamu wa Rais mama Suluhu wa kukutana na viongozi wa wafugaji huku akieleza kuwa huo ndio mwanzo  wa kupata suluhu ya kudumu ya migogoro ya wakulima na wafugaji.

Aidha Bwana Ndaturu alizitaja changamoto anazotarajia kuziwasilisha kwa Makamu wa Rais kuwa ni pamoja na uingizwaji holela wa mifugo katika maeneo yao, elimu duni ya ufugaji bora pamoja gharama kubwa za dawa za mifugo hali inayochangia wafugaji wa kipato cha chini kushindwa kuzimudu.

Hata hivyo  katibu wa wafugaji wilayani hapa bwana Malimi Joseph amewataka wafugaji wote kuungana katika kutoa mawazo ili waweze kuyafikisha kwa serikali na baadae yakafanyiwa kazi na kuondokana na changamoto zinazo wakabili.

Mkutano wa baina ya viongozi wa wafugaji na makamu rais mama samia suluu hassan unatarajia kuanza july 11 hadi 12 mwaka huu mjini dodoma.